A revista está dirixida ao público preuniversitario, co obxectivo de que sexa utilizada como material de orientación de cara á elección de estudos por parte de rapazas e rapaces dos últimos anos de ensino secundario.

Na cuarta entrega de Xenia, reflexiónase sobre o futuro das ciencias sociais humanas como alternativa de emprego para as mulleres; na sección Inxenia, tentase romper cos estereotipos sobre ciencias brandas e ciencias duras, e sobre a división dos coñecementos científicos en clases, que é produto do establecemento de categorías que non sempre se basean en criterios obxectivos.

Na sección Xenialidades: os saberes das mulleres, preséntanse exemplos de mulleres que están a liderar unha industria cultural, xa que o  patrimonio documental, histórico e artístico deixou de ser unha temática reservada á investigación e comeza a ser a base para desenvolver unha economía do coñecemento, transformando o saber herdado en desenvolvemento económico e social.

O apartado Conxenia: carreiras máis aló do xénero, mostra como o coñecemento, xunto coas novas tecnoloxías, están a cambiar a sociedade e tamén o tecido produtivo, con novas iniciativas empresariais que aproveitan as metodoloxías e técnicas das ciencias sociais para xerar valor e favorecer o desenvolvemento socieconómico. Preséntanse diversas experiencias dun grupo de mulleres neste campo empresarial.

Noutra das seccións da revista, Telexenia: investigadoras no extranxeiro, coñeceremos a tres mulleres que comparten o mesmo obxectivo no seu traballo: entender e mellorar a nosa sociedade a través das súas investigacións na áreas das ciencias sociais e do humano, facendo unha valiosa contribución á sociedade do coñecemento na que vivimos e cun impacto directo en termos de como se percibe o mundo e como se actúa sobre el.

A última das seccións, Filoxenia: descubrindo as túas orixes, é a  máis amable, divertida e práctica. Nesta ocasión abórdase a xenealoxía, e a súa aplicación prática sobre a historia da propia familia de alumnas e alumnos, dándose pautas para que de forma sinxela e entretida se investigue a historia da súa familia.