A secretaria xeral da Igualdade reúnese coa Asociación Rede de Mulleres Veciñais contra os malos tratos de Vigo

Analizaron os resultados do programa de intervención psico-social subvencionado pola Xunta co que se atendeu a preto de 100 vítimas de violencia de xénero

  • A secretaria xeral da Igualdade reúnese coa Asociación Rede de Mulleres Veciñais contra os malos tratos de Vigo
  • A secretaria xeral da Igualdade reúnese coa Asociación Rede de Mulleres Veciñais contra os malos tratos de Vigo
  • A secretaria xeral da Igualdade reúnese coa Asociación Rede de Mulleres Veciñais contra os malos tratos de Vigo

Santiago, 28 de febreiro de 2014. A secretaria xeral da Igualdade, Susana López Abella, reuniuse esta mañá coa presidenta da Rede de Mulleres Veciñais contra os malos tratos de Vigo, Rosa Fontaíña, para analizar distintas vías de colaboración e facer balance do traballo realizado pola asociación en 2013.

O ano pasado a Secretaría Xeral da Igualdade subvencionou á asociación con máis de dez mil euros para levar a cabo o Proxecto Re-Actívate de intervención psico-social con mulleres vítimas de violencia de xénero, do que se beneficiaron preto dun cento de mulleres.

Fontaíña entregóulle á secretaria xeral a Memoria 2013 da asociación, centrada especialmente na elaboración de actividades de concienciación, prevención e denuncia social; asistencia e acompañamento ás mulleres vítimas de violencia; reincorporación psico-social e laboral; formación; e ocio e tempo libre.

A Rede de Mulleres Veciñais contra os malos tratos de Vigo está composta por máis de 150 persoas, entre asociadas colaboradoras, e unha nutrida experiencia -16 anos- na prevención e asistencia ás mulleres que sofren malos tratos, así como na formación e información das mulleres en materia de violencia de xénero.