Diferentes mulleres galegas, líderes nos seus respectivos sectores, conciencian sobre esta problemática ás xeracións máis mozas en prol da igualdade
O proxecto busca reverter a crenza de que certos traballos son “masculinos”
López Abella participou este mércores nun dos dez encontros con mulleres senlleiras en distintos centros educativos de Galicia a prol da igualdade. A actividade foi dirixida a alumnado do IES A Pinguela de entre primeiro e cuarto da ESO, de 12 a 16 anos. Os mozos e as mozas escoitaron a experiencia de Ana M. Corredoira, bióloga de formación e gandeira de profesión, que está ao fronte dunha moderna granxa de explotación ecolóxica.
A discriminación da muller, explicaron as poñentes, vívese en moitos ámbitos, pero principalmente no laboral, onde a fenda salarial ou o teito de cristal son os obstáculos máis comúns que atopan as profesionais que queren triunfar na súa carreira profesional. Corredoira, que tamén é socia fundadora do proxecto As Vacas da Ulloa SCG, relatou a súa historia e respondeu ás preguntas relacionadas coa ciencia, a tecnoloxía e sobre as trabas que atopa no seu traballo.
Logo da súa visita ao IES A Pinguela, a secretaria xeral da Igualdade achegouse ata o IES Río Cabe, tamén na localidade lucense, para asistir á representación da obra teatral Golpes de sensibilización contra a violencia de xénero.
O obxectivo desta representación teatral, que está a percorrer moitos institutos galegos, é concienciar á nosa mocidade sobre a violencia de xénero.