A secretaria xeral da Igualdade, Marta González, presentou hoxe unha nova edición dos cursos de autoprotección para mulleres vítimas de violencia de xénero que impartirá o Sindicato Unificado de Policía en colaboración co departamento de igualdade da Xunta de Galicia.

Na rolda de prensa, na que tamén estiveron presentes o portavoz do Sindicato Unificado da Policía, José Freire, e un dos instructores do curso, Alejandro Gómez, a secretaria xeral da Igualdade explicou que a boa acollida que estes cursos tiveron o ano pasado, tanto en número de participantes, 79, como na boa acollida que tiveron entre as mulleres “levounos a repetir a experiencia”.

Un dos obxectivos destes cursos, dixo González,  “é que a vítima asuma que ela mesma pode contribuír á súa seguridade e que certas normas e costumes poden marcar a diferenza ante un intento de agresión”. Ademais, “tamén queren servir para reforzar a autoestima e a confianza das mulleres, encargándose de formalas e instruílas axentes responsables da súa protección”.

Os cursos dan ás participantes a posibilidade de tomar conciencia das súas propias posibilidades e límites. Deste xeito, o pensamento positivo “nin el é tan forte, nin eu tan débil” promove unha actitude mental máis determinada ante unha situación de risco. A maiores, o contacto con outras mulleres inmersas en circunstancias similares nun ambiente distendido e novo para a maioría delas, “crea lazos de retroalimentación positiva sobre elas mesmas”, mencionou a secretaria xeral.

En total, a partir de marzo de 2011 realizaranse dez cursos, un en cada unha das localidades elixidas tendo en conta o número de ordes de protección en vigor neses concellos, e que son: Ribeira, Arteixo e Ames, na provincia de A Coruña; Monforte e Vilalba, na provincia de Lugo; Verín e O Barco, na de Ourense; e Cangas, Moaña e Ponteareas, na de Pontevedra.

Cada curso terá unha duración de 12 horas e en cada un participarán entre 12 e 15 mulleres. As interesadas poderán apuntarse no Centro de Información as Mulleres (CIM) da súa localidade, a excepción do Concello de Ames, no que o rexistro farase nos Servizos Sociais do Concello.

Teoría e práctica

Os cursos contan cunha parte teórica, que se intercala coa práctica no desenvolvemento das clases dunha forma dinámica e participativa. Na área teórica, infórmase ás mulleres sobre cal son os seus dereitos, cal é o proceso que se pon en marcha desde o momento da solicitude dunha orde de protección, e cales son as competencias de cada administración nesta materia.

A parte práctica ten como obxectivo que as mulleres se impliquen na súa propia seguridade, e para iso, os funcionarios e funcionarias do Corpo Nacional de Policía que imparten os cursos ensinarán ás mulleres as técnicas e tácticas de defensa persoal adaptadas á especial situación das mulleres en diferentes circunstancias.

Aprenderán técnicas ofensivas, como golpes de puño, de cotobelos, de pernas, inmobilizacións, ou o uso de obxectos cotiás en técnicas ofensivas, como chaves, paraugas, etc...

Na área das técnicas defensivas, aprenderán a bloquear, a esquivar, a estar en garda e tamén a usar obxectos para defenderse, como cadeiras. Ademais, serán presentadas tácticas de defensa propia a aplicar en diferentes supostos, coma poden ser agresións no domicilio, agresións a terceiras persoas (menores), agresións sexuais, agresións con obxectos perigosos, etc...

Outro dos eidos nos que se traballará será no desenvolvemento de medidas de seguridade e autoprotección en lugares como os colexios, os postos de traballo, os domicilios propios ou de familiares, ou os desprazamentos a pé, en coche ou en transporte público.

A violencia de xénero

A secretaria xeral da Igualdade tamén facilitou algúns dos datos sobre a atención ás mulleres vítimas de violencia de xénero que se prestou dende a Secretaría Xeral da Igualdade no ano 2010.

En 2010, en Galicia ditáronse 1.365 ordes de protección e medidas cautelares, segundo datos do Punto de Coordinación de Ordes de Protección (PCOP). Esta cifra de 1.365 ordes ditadas supón unha diminución en 331 respecto ao ano anterior. E unha vez máis A Coruña, seguida de Pontevedra, son as provincias onde mía ordes de protección se dictaron.

Ademais, en Galicia en 2010 instaláronse por decisión xudicial 23 pulseiras electrónicas de control a maltratadores e desinstaláronse 7, polo que estaban activas a finais de 2010 16. A provincia de A Coruña e a que máis tiña, con 6, seguida de Pontevedra e Lugo con 5 cada unha, e en Ourense non había a 31 de decembro de 2010 ningunha pulseira activa.

No que se refire ás axudas periódicas a mulleres que sofren violencia, o chamado "salario da liberdade", concedéronse 369 axudas a mulleres por un importe de 1.741.127 euros, despois de realizar dúas ampliacións de crédito, a cifra máis elevada dende que esta axuda foi creada no ano 2006, e por primeira vez os pagos están ao día e non se xeraron novos retrasos.

Por nacionalidade, as mulleres españolas foron as que máis a recibiron, seguidas moi de lonxe de mulleres de orixe portuguesa e brasileira. O 37,7 por cento das mulleres que recibiron esta axuda non tiña fillos/as, o 32,9% tiña un único fillo/a, o 19,3% tiña dous, o 6,1% tiña 3, o 3,5 tiña 4 e un 0,4% tiña cinco menores ao seu cargo.

A maioría das beneficiarias está no rango de idade que vai dos 36-40 anos (un 18,9%), seguidas polas beneficiarias que teñen entre 31-35 anos (un 17,1%), as que están no rango entre os 41-45 anos (un 14,5%) e finalmente as mulleres que están entre os 26-30 anos, que foron un 13,2% do total das mulleres perceptoras desta renda.

No que se refire  á axuda económica de pagamento único, establecida no artigo 27 da Lei Orgánica 1/2004, para mulleres que sofren violencia de xénero, concedeuse en 2010 a 28 mulleres, 18 más que en 2009, por un total de 173.811 euros. Por provincias as axudas foron 18 na Coruña, 5 en Pontevedra, 3 en Lugo e 2 en Ourense.

Do programa de atención psicolóxica a mulleres vítimas de violencia de xénero e para as e os menores e outras persoas dependentes ao seu cargo, foron usuarias en 2010, 376 mulleres, 129 menores e 4 persoas dependentes. Estas cifras mostran un incremento considerable respecto ao 2009, no que se refire ás mulleres, 106 máis, e aos e as menores, 40 máis que no ano anterior.

O programa Abramos o Círculo, de atención psicolóxica especializada e de apoio dirixido a homes que adoptan actitudes inadecuadas nas relacións coa súa parella e coa súa familia, e que desexan adquirir novos modos de comportamentos exentos de agresividade, tivo en 2010 a 64 usuarios, 16 máis que en 2009; de feito 2010 foi o ano con maior número de usuarios dende que foi creado en 2001.

Outro dos servizos de apoio ás mulleres que a Xunta de Galicia pon a dispor das mulleres é o Teléfono da Muller, o 900 400 273, que no ano 2010 recibiu 3.797 chamadas, a maioría delas feitas por mulleres -o 91%- e dende o eido urbano – un 72%-. Ademais, o 47% desas chamadas fixéronse para solicitar asesoramento psicolóxico, e o 14%, para pedir asesoramento xurídico: estes dos tipos de información e asesoramento  son os que máis relacionados están coa violencia de xénero.